Taller de acuarela con Eduardo Baamonde

Hoxe no IES Monte da Vila tivemos a oportunidade de realizar un obradoiro co talentoso acuarelista Eduardo Baamonde, que veu darnos unha clase sobre acuarela, na que nos explicou detalles da súa carreira artística, os fundamentos da técnica e aconsellounos sobre como traballar con ela.

Na primeira parte do obradoiro estivemos observando como traballaba e na segunda xa nos tocou a nós aplicalo na práctica. Na miña opinión, foi unha experiencia marabillosa, ver todas as cousas fermosas que ofrece a acuarela e poder ver o traballo e técnica en vivo de alguén profesional.

Reseña de Lorena Navarro y Candela Torres

Encontro de Manuel Esteban co club de lectura do concello

Vivín o momento máis diferente e interesante do Montenegro deste ano no encontro co club de lectura do concello, no que se xuntaron vinte e tres mulleres do Grove con Manuel Esteban, autor do libro que as reunira, A ira dos mansos.

Foi para min unha sorpresa vivir a intensidade destas mecas, que instaban a Esteban a contestar unha chea de preguntas só cortadas polo timbre que indicara que a sesión acabara e o escritor debía xuntarse cun novo grupo, desta vez de bacharelato. E as cuestións chegaron incluso vía whatsapp, porque aínda tendo cita médica ninguén quixo deixar de transmitir as súas dúbidas, precisións ou impresións sobre a lectura.

Así, o empece encheuse de emoción mentres o autor contaba o seu coñecemento do Síndrome de Down a través do seu fillo Antón e a empatía fíxose patente nun grupo que sabe da vida porque a viviu. Non hai preocupación máis grande que a que vén da man dun fillo ou dunha filla, sabíano e abrazaron desde o primeiro instante o relato de Manuel.

A continuación veu a vez delas, e non deron tregua. Preguntaron, reprenderon, aconsellaron... en definitiva, deixaron ben claro que son unhas lectoras de primeiro nivel, esixentes e desexosas de falar con Manuel Esteban.

Só deu pena que non houbese máis tempo para interactuar. Conseguiron, iso si, unha promesa de que non será a última vez que o escritor volva ao Grove a falar con elas. Collémoslle a palabra mentres imos lendo o resto das súas obras.

 Mónica Góñez Silva

OBRADOIRO DE CONCIENCIA CORPORAL E ARTE. ISABEL ESPINOSA

Reseña de Omar Assane Ndoye Valladares (1ºESO B)

No obradoiro primeiro estivemos andando pola biblioteca e estirando mentres Isabel Espinosa tocaba a pandeireta e cada golpe era un paso. Despois dous, tres, catro e cinco.

A continuación deitámonos cos ollos pechados mentres ela dicía que imaxináramos que estabamos nun bosque con moitas árbores grandes e pequenas. Tiñamos que elixir unha e subir a ela sós ou con alguén.

Tamén tiñamos que sentir o vento na cara, baixar e abrir os ollos para debuxar o que viramos do bosque e

das árbores. Despois estivemos falando e tivemos que volver para a clase.

A min gustoume moito todo, menos debuxar.

Reseña de Amara López Martínez (1ºESO B)

O día 11 de abril tivemos un encontro con Isabel Espinosa, que fixo de guía na nosa actividade. Estivo ensinándonos a facer figuras e poñernos de acordo sen falar. Tamén vimos a relaxación; estivemos nunhas colchonetas cos ollos pechados e relaxados mentres imaxinabamos o que ela nos contaba.

Despois diso fixemos un debuxo que era totalmente libre, podiamos tanto rachar o papel como pegar periódicos, pintar con cera, pintar con rotuladores...

A miña opinión é boa. O problema estivo na duración. Dúas horas foi pouco tempo, porque aínda que parecen poucas cousas, levan moito traballo e paciencia, e ao final quedáronnos cousas pendentes.

Gustoume moito que nos deu moitísimos materiais: cartolinas de todas as cores, papeis de distintos tipos e con distintos estampados. Ela foi moi boa monitora e soubo levarnos polo bo camiño para desconectar.

A parte que menos me gustou creo que foi cando estivemos camiñando e facendo figuras e a parte que máis me gustou foi cando fixemos a relaxación e o debuxo porque podías facer todo libre.

Eu recoméndollo a outras persoas e gustaríame volvelo a ter aquí no instituto.

Reseña de Antonio Domínguez Figueiro (1ºESO B)

Hoxe, día 11 de abril de 2024, tivemos nas dúas primeiras horas lectivas un obradoiro sobre a conciencia corporal e a arte.

Cando chegamos á biblioteca, este foi o lugar elexido para o obradoiro, presentouse Isabel Espinosa.

Para comenzar a actividade empezamos a camiñar pola sala mentres Isabel tocaba diversos instrumentos.

Esta primeira actividade pareceume un pouco absurda porque non entendía para que servía e ademais ela non a explicou moi ben.

Despois collemos unhas colchonetas e colocámolas no chan para deitarnos nelas mentres nos imaxinabamos un paseo polo bosque e posteriormente debuxar o que pensabamos. Esta segunda actividade gustoume porque me fixo reflexionar.

Por último fixemos unha asamblea para falar sobre o que nos gustara e o que non.

En conclusión, este obradoiro gustoume e oxalá regrese para o ano que vén.

Actividades 11 de abril. Festival Montenegro

O pasado xoves 11 o noso instituto puido gozar da visita de dous xenios da ilustración, Eduardo Baamonde e María Isabel Espinosa, como parte do VI Festival Montenegro de Arte e Novela Negra.

A mañá estivo chea de creatividade e aprendizaxe, mentres os estudantes interactuaban nos obradoiros con estes talentosos artistas.

No almorzo, ilustradores e parte do profesorado asistiron a unha comida organizada polo Obradoiro da Lanzada, onde se compartiron experiencias e reflexións sobre as actividades do día, e o éxito da participación do alumnado.

Queremos agradecer aos organizadores do obradoiro da Lanzada, aos ilustradores e a tod@s @s alumn@s por facer deste día algo especial. Foi xenial ver a antigo alumnado do centro, cheos de ilusión e profesionalismo na súa nova etapa de aprendizaxe.

Como comentou unha alumna participante: 

“oxalá puidésemos gozar máis veces de actividades así!”

Marcia Fernández

VII Festival Montenegro

 

Entrega Premios VI Certame Relatos Breves Montenegro

 

VI CERTAME LITERARIO DE RELATOS BREVES MONTENEGRO 2024

Xénero: relatos breves de temática negra

 Convoca: IES Monte da Vila (O Grove - Galiza)

---

Bases:

 1.  O concurso está aberto a calquera persoa. Estabelécense as seguintes categorías:

●     A: 1º e 2º de ESO.

●     B: 3º e 4º de ESO e FP Básica.

●     C: Bacharelato e Ciclos formativos.

●     D: Maiores 18 anos.

 2.  Os textos estarán escritos en galego, con letra Arial, tamaño 12, con 600 palabras como máximo e un mínimo de 100.

 3.  Os textos deberán ser orixinais e inéditos, e inspiraranse nos contidos da noticia publicada no xornal O Noso Grove titulada “Aparecen restos humanos nunha praia do Grove”, que acompaña estas bases.

 4.  A data límite de entrega será o 29 de febreiro de 2024 (ás 23:59 min).

 5.  Os relatos enviaranse ao correo electrónico: relatosmontenegro@gmail.com.  O envío constará de  dous documentos:

a) ficha de inscrición cos datos da persoa participante (nome e apelidos, título da obra, categoría en que participa e pseudónimo).

b) outro co relato, indicando ao comezo o título da obra e o pseudónimo (sen referencia á persoa participante).

 6.  Premios: por cada categoría haberá un relato gañador e un finalista.

Os premios consistirán nun lote de libros e un diploma acreditativo, ademais do dereito a participar gratuitamente nunha excursión a final de curso.

Os relatos serán publicados.

 7.  Xurado: estará composto por catro integrantes, a coordinadora do festival e o escritor Manuel Esteban.

O xurado resérvase o dereito de deixar deserto algún premio.

  

Para consultas ou dúbidas podes dirixirte ao profesorado da biblioteca do IES Monte da Vila ou ao correo electrónico relatosmontenegro@gmail.com.

Pulsa para descargar as bases e a folla de inscrición.