V CERTAME LITERARIO DE RELATOS BREVES MONTENEGRO 2023

 

 Xénero: relatos breves de temática negra

 Convoca: IES Monte da Vila (O Grove - Galiza)

---

Bases:

1.   O concurso está aberto a calquera persoa, estabelécendose as seguintes categorías:

●    A: 1º e 2º de ESO.

●    B: 3º e 4º de ESO e FP Básica.

●    C: Bacharelato e Ciclos formativos.

●    D: Maiores 18 anos.

2. Os textos estarán escritos en galego, con letra Arial, tamaño 12, con 600 palabras como máximo. Non haberá un mínimo.

3. Os temas deberán ser orixinais e inéditos, e inspiraranse nos contidos da noticia publicada no xornal O Noso Grove titulada “Atopan no Grove un cadáver mentres rescataban unha persoa secuestrada” do venres 13 de xaneiro de 2023.

4. A data límite de entrega será o 17 de febreiro de 2023 (ás 23:59 min).

5. Os relatos enviaranse ao correo electrónico:   reatosmontenegro@gmail.com.  O envío constará de  dous documentos: a) ficha de inscrición cos datos da persoa participante (nome e apelidos, título da obra, categoría en que participa e pseudónimo); b) outro co relato, indicando ao comezo o título da obra e o pseudónimo (sen referencia á persoa participante).

6. Premios: haberá un primeiro premio e tamén finalistas por cada categoría que recibirán un lote de libros e un diploma acreditativo. Os relatos serán publicados.

7. Xurado: estará composto por catro integrantes, a coordinadora do festival e as escritoras Sara Alonso Vila e Arantza Portabales.  O xurado resérvase o dereito de deixar deserto algún premio.

 

Para consultas ou dúbidas podes dirixirte ao profesorado da biblioteca do IES Monte da Vila ou ao correo electrónico relatosmontenegro@gmail.com.

 

A ESCRITA NON TRABA, NON DEIXA MANCADURAS…

DEIXA FERMOSAS PEGADAS!

Pulsa para acceder ás bases en formato pdf e á ficha de inscrición.

Noticia no diario

  O Noso Grove

Venres 13 DE XANEIRO DE 2023

 

Atopan no Grove un cadáver mentres rescataban unha persoa secuestrada

O cadáver foi detectado polos cans que participaban no dispositivo de rescate

 O Grove / M. Peña 12/01/2023 21:37 H.

No día de onte, nunha zona de chalés deshabitados fóra da época turística, unha persoa foi rescatada do soto dunha vivenda na que permanecía secuestrada. A vítima, da que non transcenderon datos oficiais, podería ser unha muller segundo as declaracións dunha testemuña que observaba o rescate nas inmediacións do perímetro policial.

 

De feito, e segundo a mesma fonte, parece ser que a policía iniciou as indagacións a raíz do aviso de dúas veciñas que acostumaban a pasear pola zona e que nos últimos días non deixaban de ver uns cans ladrando sen control no exterior dunha vivenda en aparencia baleira.

O dispositivo policial iniciouse cara ás nove da mañá de onte e unha hora máis tarde foi evacuada e trasladada en ambulancia unha única persoa.

 

Porén, a investigación continuou ata ben entrada a tarde e foron os cans da policía, a media mañá, os que detectaron a presenza de restos humanos enterrados no eido da casa.

 

A forense desprazada ata o lugar falou cos medios presentes alí para comunicar que os restos, enterrados moi cerca da superficie, puideron ser o motivo do descontrol dos cans que chamaran a atención das veciñas. Os primeiros indicios e á falta dunha análise máis profunda, sinalan que poderiamos estar diante do cadáver dunha muller, probablemente asasinada.

 

No momento da publicación desta noticia descoñecíase a existencia de datos policiais, se ben xa se estarían investigando e analizando as primeiras probas recollidas no lugar, a fin de dilucidar se existe relación entre ambas as dúas descubertas e se é posible recoñecer a súa autoría.

 

O feito de que o edificio se sitúe nunha zona pola que pasa moita xente durante a época estival non fai máis que incrementar as dificultades que deberá salvar a policía para resolver o caso. A considerable distancia que o afasta do núcleo urbano, atópase no medio dun piñeiral, tampouco vai axudar.